- A Eucaristía celebrouse na Capela do Seminario Maior e contou coa presenza do bispo auxiliar, o reitor, formadores e seminaristas
O Seminario Maior de Santiago de Compostela celebrou hoxe, día 11 de novembro, a festividade de San Martiño de Tours, patrón da institución formativa e educativa. O arcebispo de Santiago, monseñor Julián Barrio, presidiu a Eucaristía Capela do Seminario Maior. “San Martiño”, dixo don Julián na súa homilía, “manifestou alma de pastor ofrecendo a súa vida polas ovellas, non exercendo o poder sobre elas como un funcionario, ríxido e observador do propio horario de traballo e celoso custodio da súa privacidade, e conmovéndose co corazón e coa mente ante a situación de dispersión que vivían. Foi construíndo a convivencia sen ceder ás esixencias acomodaticias do momento”.
Monseñor Barrio engadiu que San Martiño foi un home admirado pola súa sabedoría e amado pola súa bondade: “Austero, sacrificado, contemplativo e peregrino do Absoluto, forma parte da memoria espiritual da Europa cristiá, como testemuño da liberdade da fe. Evanxelizou loitando contra a terxiversación da mensaxe cristiá, a idolatría, as supersticiones, a miseria humana e as manifestacións do mal. O silencio do mosteiro que favoreceu o seu diálogo con Deus, convértese máis tarde en poderosa palabra evanxelizadora da cultura que é o modo de expresar a visión cristiá do home, pois o corazón de cada cultura está constituído polo seu achegamento ao máis grande dos misterios, o misterio de Deus”.
A festividade de San Martiño de Tours reuniu a toda a comunidade de seminaristas do Seminario Maior, con Carlos Álvarez, o reitor, á cabeza; así como a boa parte dos integrantes das comunidades educativas diocesanas, tanto o Instituto Teolóxico Compostelán (ITC) como o Instituto Superior Compostelán de Ciencias Relixiosas (ISCCR). Acompañaba a monseñor Barrio o seu bispo auxiliar, monseñor Francisco Prieto.
O arcebispo instou os presentes a non contentarse cunha vida mediocre e cunha relixiosidade superficial: “Se vivimos polo Espírito obremos segundo o Espírito. O home supera infinitamente ao home e non debe quedar reducido a unha variable do mercado, ou a ser un factor totalmente irrelevante nas opcións decisivas. Deus sorpréndenos sempre porque nos dá como graza aquilo que nos pide como misión”.
