Monseñor Prieto: coñecer distintas realidades diocesanas en algo máis dun mes como bispo auxiliar

Algo máis dun mes despois de ser ordenado bispo auxiliar de Santiago de Compostela, monseñor Francisco José Prieto Fernández tivo ocasión de coñecer distintas realidades diocesanas, tanto a través da súa axenda de celebracións litúrxicas como de diversos encontros e reunións. O día 17 de abril, fíxose presente ao comezo da sesión ordinaria do Cabido Metropolitano para saudar os Sres. Capitulares; o día 28, entrevistouse co Director de Caritas Diocesana e visitou a sede de Mans Unidas en Santiago de Compostela; e, o día 29, visitou os sacerdotes residentes na Casa Sacerdotal, compartindo a comida con eles.

Monseñor Prieto tamén participou no Acto Penitencial levado a cabo no marco do primeiro retiro Effetá, versión para mozas dos Retiros de Emaús, o día 24 de abril na Igrexa de San Martiño Pinario, un encontro que clausurou o arcebispo, monseñor Julián Barrio.

Ademais, o 25 de abril, con motivo da festa patronal, o bispo Auxiliar presidiu a Misa solemne na parroquia de san Xurxo de Cereixo. Un día despois, o 26 de abril, tivo lugar unha webinar para sacerdotes, relixiosos e relixiosas do Camiño de Santiago. No encontro participou tamén o bispo auxiliar, quen desenvolveu o relatorio “O Ano Santo Compostelán e a Nova Evangelización”. A reunión, que se desenvolveu por primeira vez de forma telemática, congregou a membros de vida consagrada que levan a cabo un labor de acollida nas súas parroquias ou comunidades ou que acompañan peregrinacións a Compostela. O evento, organizado por Acollida Cristiá nos Camiños, foi inaugurado polo arcebispo.

Por outra banda, o 27 de abril, no Centro Internacional de Acollida ao Peregrino, celebrouse unha reunión da Comisión do Ano Santo, que foi presidida por primeira vez por monseñor Prieto.

No mes de maio, o bispo auxiliar participou por vez primeira na reunión dos bispos da Provincia Eclesiástica de Santiago, que se celebrou nas dependencias do Arcebispado compostelán o día 7. Monseñor Prieto presidiu, ademais, confirmacións na Igrexa de Santa Mariña de Cambados, na Parroquia de Santa María de Castelo, na Igrexa de Santiago de Carril e na Igrexa de Arzúa.

E coincidindo cos actos organizados ao redor da festa de san Xoán de Ávila, o bispo auxiliar impartiu entre os días 11 ao 13 de maio unha quenda de Exercicios Espirituais a sacerdotes diocesanos.

Tamén esta semana asistiu ás Xornadas da Comisión de Medios de Comunicación Social na sede da Conferencia Episcopal Española, nas que se entregaron os premios Bravo e se reuníronse distintos delegados de Medios de Comunicación das dioceses españolas.