O Instituto Superior Compostelán de Ciencias Relixiosas clausurou o primeiro curso sobre Transhumanismo, que foi impartido polo profesor do centro, Gonzalo Rodríguez César baixo o título xenérico: “Retos do Transhumanismo á fe cristiá”.
Nas súas exposicións o profesor Rodríguez César fixo un repaso pormenorizado sobre os antecedentes filosóficos deste novo movemento que promete eliminar todas as limitacións da humanidade, incluída a morte, e que busca, na súa postura máis radical, a extinción do ser humano tal como o entendemos en beneficio do ciborg.
O curso, que se repetirá nos próximos anos, intégrase na nova proposta formativa que o ISCCR quere achegar a todos os laicos da arquidiocese que desexen ampliar a súa formación. O obxectivo é facilitar as ferramentas necesarias para poder dar resposta aos grandes retos que o mundo postmoderno actual lle expón constantemente á fe.
No marco desta estratexia sitúanse os dous cursos que o centro ofertou este ano á marxe do ciclo institucional: este sobre Transhumanismo e outro sobre Arte, Educación e Teoloxía impartido pola profesora Fátima Noya.
