A 118ª Asemblea Plenaria da Conferencia Episcopal Española (CEE) clausurarase o venres 19 de novembro en Santiago de Compostela. 63 bispos españois, dous administradores diocesanos e os dous vicesecretarios da CEE, acompañados do nuncio apostólico en España, Mons. Bernardito C. Auza, peregrinarán ata a cidade do Apóstolo con motivo do Ano Santo Compostelano.
Ofrenda ao Apóstolo do cardeal Omella
O acto central será a Misa do Peregrino ás 11.00 horas na catedral, que será retransmitida en directo por TRECE. Os bispos accederán ao templo, por volta das 10.45 horas, pola Porta Santa para venerar, na cripta, o sepulcro do Apóstolo Santiago.
Presidirá a celebración eucarística o arcebispo de Santiago, mons. Julián Barrio. Trala lectura do Evanxeo, o presidente da Conferencia Episcopal Española, cardeal Juan José Omella, fará a ofrenda ao Apóstolo en nome dos bispos españois.
